తెలుగు రాష్ట్రాలకు చల్లటి కబురు.. ఈసారి ముందుగానే నైరుతి రుతుపవనాలు

అధిక ఉష్ణోగ్రతలు, తీవ్రమైన ఉక్కపోతతో అల్లాడుతున్న తెలుగు రాష్ట్రాల ప్రజలకు భారత వాతావరణ విభాగం (ఐఎండీ) చల్లటి కబురు అందించింది. ఈ ఏడాది నైరుతి రుతుపవనాలు కాస్త ముందుగానే దేశంలోకి ప్రవేశించనున్నాయని శుక్రవారం అధికారికంగా ప్రకటించింది. సాధారణంగా జూన్ 1న కేరళ తీరాన్ని తాకే రుతుపవనాలు, ఈసారి మే 26 నాటికే ప్రవేశించే అవకాశం ఉందని అంచనా వేసింది. దీనికి నాలుగు రోజులు అటుఇటుగా ఉండే అవకాశం ఉందని కూడా స్పష్టం చేసింది.

వాతావరణ పరిస్థితులు అనుకూలంగా ఉండటంతో రుతుపవనాలు శనివారం నాటికి అండమాన్ నికోబార్ దీవులను తాకాయి. బంగాళాఖాతంలో ఏర్పడిన అల్పపీడనం బలపడి వాయుగుండంగా మారి ఆంధ్ర, తమిళనాడు తీరాల నుంచి దూరంగా కదులుతోంది. ఈ పరిణామాల నేపథ్యంలో రుతుపవనాల రాకకు మార్గం సుగమమైందని వాతావరణ నిపుణులు చెబుతున్నారు. రుతుపవనాలు ఉత్తరం వైపు పయనించే కొద్దీ ఉష్ణోగ్రతలు క్రమంగా తగ్గుముఖం పడతాయని, ప్రజలకు వేడి నుంచి ఉపశమనం లభిస్తుందని ఐఎండీ తెలిపింది. గత 21 ఏళ్లుగా ఐఎండీ రుతుపవనాల రాకపై కచ్చితమైన అంచనాలను వెలువరిస్తోంది.

ఏపీలో వింత వాతావరణం
ప్రస్తుతం తెలుగు రాష్ట్రాల్లో, ముఖ్యంగా ఆంధ్రప్రదేశ్‌లో వింత వాతావరణం నెలకొంది. ఒకవైపు కొన్ని ప్రాంతాల్లో 45 డిగ్రీల వరకు ఉష్ణోగ్రతలు నమోదవుతుండగా, మరోవైపు పలుచోట్ల అకాల వర్షాలు కురుస్తున్నాయి. రాష్ట్రంలోని పలు జిల్లాల్లో తీవ్రమైన వడగాల్పులు వీచే అవకాశం ఉందని రాష్ట్ర విపత్తుల నిర్వహణ సంస్థ హెచ్చరించింది. ముఖ్యంగా అల్లూరి, పోలవరం, కోనసీమ, తూర్పుగోదావరి, ఎన్టీఆర్, అనంతపురం జిల్లాల్లోని సుమారు 20 మండలాల్లో ఉష్ణోగ్రతలు 44 డిగ్రీల వరకు చేరవచ్చని తెలిపింది.

అదే సమయంలో అల్లూరి సీతారామరాజు, శ్రీ సత్యసాయి, కడప, కర్నూలు, నంద్యాల జిల్లాల్లోని కొన్ని ప్రాంతాల్లో తేలికపాటి వర్షాలతో పాటు పిడుగులు పడే ప్రమాదం ఉందని హెచ్చరికలు జారీ చేసింది. ఈ నేపథ్యంలో రైతులు, పశువుల కాపరులు చెట్ల కింద ఆశ్రయం పొందవద్దని అధికారులు సూచించారు. మొత్తం మీద రుతుపవనాల రాక కబురు ఆశలు రేపుతున్నప్పటికీ, ప్రస్తుతానికి ప్రజలు అధిక వేడి, పిడుగుల విషయంలో అప్రమత్తంగా ఉండాలని అధికారులు కోరుతున్నారు.